6 сарын 21-нд нээхээр төлөвлөн хаасан Доржийн гудамжны баруун хэсэг буюу КТМС-ийн урдах авто замын хөдөлгөөнийг нээх хугацаа хойшлох төлөвтэй байна. Учир нь замын доогуурх дулаан, бохир ба цэвэр ус, холбооны кабель шугамуудыг хүчитгэх, шинэчлэх ажлууд удаашралтай явагдаж байгаа бөгөөд тус замыг өргөтгөн шинэчлэх төсөвт дээрх инженерийн шугам сүлжээний ажлын өртөг суугдаагүй байсан юм. Ийнхүү төлөвлөгдөөгүй инженерийн шугам сүлжээний ажлууд нь зам хийх графикт хугацааг хойшлуулан, улмаар замын түгжрэлийг олон хоногоор нэмэгдүүлж, олон нийтийг бухимдуулж байна.

Шарга морьт – Жигжидийн уулзвараас Гүнтийн даваа чиглэлд 5 км замын өргөтгөл, шинэчлэлтийн ажил эхлээд байна. "Жэй Кэй Си" ХХК энэ оны 10 сарын 30 хүртэл зам барилгын ажил гүйцэтгэхээр гэрээ байгуулсан. Уулзвараас хойш 900 метр замыг 6 сарын 21-нээс эхлэн хааж, замын өргөтгөлийн газар шорооны ажил, ус зайлуулах 2 төмөрбетон хоолойг угсрах ажлыг хийнэ. Замыг 7 сарын 10-нд нээнэ.

Эскадрилийн хөшөөнөөс Улаанхуарангийн эцэс хүртэлх авто замын хучилтыг гүйцэтгэж, УБЗЗАК замын хөдөлгөөнийг нээсэн байна. Мөн БЗД-ийн Тамгын газраас Офицеруудын ордон чиглэлд хаалттай байсан 300 метр замын урд урсгалыг өнөө өглөө нээж, хойд талын урсгалд 400 метр хэсгийг хаалаа. 7 сарын 09 хүртэл Зүүн 4 зам чиглэлийн хойд урсгалыг хэсэгчлэн хааж хучилтын ажил гүйцэтгэх юм.